सरकारले सञ्चालन गरेको करदाता प्रोत्साहन उपहार कार्यक्रममा कात्तिक १ देखि १५ गतेसम्म सामान खरिद गर्ने १६ जना उपभोक्ता नगद उपहारका लागि छनोट भएका छन्।
आन्तरिक राजस्व विभागले सार्वजनिक गरेको विवरणअनुसार १५ जना दैनिक उपहारका विजेता बनेका छन्।
उनीहरूले फरक–फरक रकम नगद उपहार पाउनेछन्।
यस अवधिको बम्पर उपहार भने एक जनाले जितेका छन्। उनले १० लाख रूपैयाँ पाउनेछन्।
बम्पर उपहार जित्ने मोवाइल नम्बर ९८******०३ को ०९८०४६५५८१७५ नम्बरको कुपन नम्बरले बम्पर उपहार जितेको हो।
एक लाख रूपैयाँको दैनिक उपहारतर्फ सबैभन्दा बढी २२ हजार रूपैयाँ स्वरोजगार लघुवित्त वित्तीय संस्थासँगको कारोबारले जितेको छ।
२० हजार रूपैयाँ तुषार सफ्टवेयर डेभलपमेन्ट प्रालिसँगको कारोबार, गुरुङ होटलसँगको सात हजार ५७५ रूपैयाँ र भाटभटेनी सुपरमार्केटले दुईवटा कुपनबाट क्रमशः चार हजार ५०० र छ हजार ६० रूपैयाँको कारोबारबाट विजेता देखिएका छन्।
यस्तै, एग्रोनोभा सोलुसन प्रालिले पाँच हजार रूपैयाँ, दिनेश एन्ड विकास जनरल स्टोरले दुई हजार ३५० रूपैयाँ, लालगढ मोडल अस्पताल प्रालिले दुई हजार ३४० रूपैयाँ र आदर्श आयल स्टोर्सले दुई हजार १०० रूपैयाँको खरिदमा पनि विजेता छनोट भएका
श्रीवास्तव ट्रेडिङ प्रालि, राधा फेन्सी सप र प्रहरी कल्याण कोषको पेट्रोल पम्पले दुई–दुई हजार रूपैयाँको कारोबारले पनि एक/एक लाखको उपहार जितेका छन्।
श्री बागलुङ म्याग्दी मिट सपले ६५० रूपैयाँ, शास्त्री फार्मेसीले २४० रूपैयाँ र प्रशान्त किराना पसलले २३० रूपैयाँको कारोबार गर्ने व्यक्ति पनि १५ भित्र छन्।
सरकारले मूल्य अभिवृद्धि कर (भ्याट) र अन्तशुल्कमा दर्ता भएका व्यवसायबाट सामान तथा सेवा खरिद गर्दा अनिवार्य रूपमा बिल लिन प्रोत्साहित गर्ने उद्देश्यले यो कार्यक्रम सञ्चालन गरेको हो।
उपभोक्ताले खरिदको बिलमा रहेको विवरण कार्यक्रमको प्रणालीमा दर्ता गरेपछि उपहार योजनामा सहभागी हुन पाउँछन्।
यसअघि पनि विभागले दैनिक तथा बम्पर उपहारका विजेता सार्वजनिक गर्दै आएको छ।
बिल लिने र त्यसलाई प्रणालीमा दर्ता गर्ने उपभोक्तालाई नगद उपहार दिएर कर प्रणालीमा आबद्धता बढाउने सरकारको उद्देश्य छ।
सरकारले बिल जारी गर्ने व्यवसाय र बिल लिने उपभोक्ता दुवैलाई कर प्रणालीप्रति जिम्मेवार बनाउन यस्तो कार्यक्रम ल्याएको हो।
